بمناسبة عيد العرش ثار انتباهي توشيح الملك واحد الشاب بوسام المكافأة الوطنية من درجة ضابط
وفالتقديم قالو بانه خدام فوكالة الفضاء اليابانية ، فالبدية قلت غادي يكون غي شي واحد زايد تما و متايعرف على المغرب غي الشمس والكسكسو ولكن فاش هضر ثار انتباهي الدارجة المسرحة ديالو قلبت عليه وهادشي لي لقيت.
رشيد عمروس، تزاد فأولاد فرج فدكالة وبالضبط فمنطقة خميس متوح سنة 1983، تزاد وسط اسرة بدوية وسط 4 خوت...،قرا فالمدرسة العمومية حتى شد الباك من بعد مشا لجامعة شعيب الدكالي فالجديدة، باش يكمل قرايتو فتخصص الكيمياء.
ف2006 غادي ياخد الاجازة ديالو بميزة حسن والرتبة الأولى، شي لي غادي يخليه ياخد منحة باش يكمل قرايتو فجامعة"بواتيي" ففرنسا تخصص"الدراسات المعمقة في كيمياء الحفازات الكيماوية والبيئة"
ملي خدا الماستر تختار باش يدير أطروحة فواحد من مختبرات الأبحاث فجامعة "بواتيي" خدم على مشروع الإشعال التحفيزي لخليط الهيدروجين و الأوكسجين تحت مفعول حرارة منخفضة باش يتحكمو بمدار "آريان 5" المكوك الفضائي ديال وكالة الفضاء الفرنسية، شي لي خلاه ياخد دكتوراه الدولة الفرنسية سنة 2010 بميزة "مشرف جدا" .
من مور ماشد الدكتوراه دوز مباراة باش يدخل لل"جاسكا" مع 21 اخرين ، عشرين ياباني وهو تنافسو على عشرة المناصب 10، ونجح ولا أول أجنبي تيشغل مهمة مهندس البحث و التطوير فال"جاسكا"، وبالتالي ولا الاجنبي الوحيد لي خدام فيها.
حاليا هو تايعيش فطوكيو مع مراتو الجزائرية، وخدام مع شي زملاء اليابانيين، على إمكانية تبديل "الهيدرازين" كوقود طاقي سام وخطير بسوائل أخرى أقل خطورة، وكذا التحكم فمسار الأقمار الاصطناعية بتجريب العديد من الدواسر الكيماوية.
المصدر:حوار مع الصحفي زكرياء بوجنة
